«Hamma narsaning oxiri» romani muallifi Buker mukofotini qoʻlga kiritdi
Britaniyalik yozuvchi Maykl Jon Harrison «Hamma narsaning oxiri» romani uchun 2026-yilgi Buker mukofotini oldi. U 81 yoshida ushbu mukofot tarixidagi eng keksa laureatga aylandi.
Gʻolib Londonda oʻtkazilgan marosimda eʼlon qilindi. Harrisonga £50 ming va Buker mukofotining haykalchasi topshirildi. U mukofot tarixidagi eng keksa laureat boʻlib, 79 yoshida mukofotni olgan avvalgi rekordchi — Margaret Etvuddan oʻzib ketdi.
«Hamma narsaning oxiri» Harrisonning Bukerga ilk nomzodligi va joriy yilgi qisqa roʻyxatdagi eng qisqa kitob boʻldi. Yozuvchi ilgari mukofot hayʼati tarkibida ham ishlagan.
Roman voqealari sirli halokat va iGhetti deb ataladigan mavjudotlar bosqinidan keyin Angliyaning Kent grafligi sohilida kechadi. Bosh qahramon Filip Tennent dengiz qirgʻoqqa chiqarib tashlagan buyumlarni terib oladi va keksa xolasi Marni bilan yashaydi. Bir kuni u jelega oʻxshash mavjudotni topib oladi: u tez oʻsadi, gapirishni oʻrganadi va odamlarga buyruq bera boshlaydi.
Hayʼatga tarixchi va teleboshlovchi Meri Berd rahbarlik qildi. Gʻolib bir kun davom etgan muhokamalardan soʻng bir ovozdan tanlandi. Berd romanni «bugungi siyosatning kelajak prizmasi orqali koʻrsatilishi» deb atadi. Uning soʻzlariga koʻra, kitob apokalipsisni ham shunday hodisa sifatida tasvirlaydiki, u anglab boʻlmaydigan voqea boʻlib chiqadi, shundan keyin avvalgi qoidalar ishlamay qoladi.
Avvalgi Buker mukofotini kelib chiqishi vengriyalik boʻlgan britaniyalik yozuvchi Devid Saley «Goʻsht» romani uchun olgan. Kitobda Vengriyadagi hayotdan London qasrlarigacha boʻlgan yoʻlni bosib oʻtgan Ishtvan haqida hikoya qilinadi. Keyin u oʻz farovonligining yemirilishiga duch keladi.
Buker mukofoti har yili Buyuk Britaniya yoki Irlandiyada nashr etilgan ingliz tilidagi asarga beriladi. Tanlovda istalgan millatga mansub mualliflar qatnashishi mumkin.
