Avstraliyada dunyodagi eng tor osmonoʻpar binolardan biri — «qalam minora» quriladi
Sidneyning Haymarket hududida 173 xonali, 33 qavatli mehmonxona minorasi ustida dastlabki ishlar boshlandi. Qurib bitkazilgach, u shahardagi eng tor baland bino boʻladi.
Qurilish Pitt Street koʻchasida, qariyb 345 kvadrat metr maydondagi uchastkada olib borilmoqda. Binoning Pitt Street tomondagi fasadi atigi 6,4 metr kenglikda boʻladi — bu bir-biriga zich qilib qoʻyilgan ikkita kichik xetchbekning uzunligiga taxminan teng.
Loyiha bir necha yil davomida ishlab chiqildi va kelishuvlardan oʻtkazildi, yaqinda esa amaliy bosqichga oʻtdi: maydonda dastlabki qurilish ishlari boshlandi. Qurib bitkazilgach, obyekt Sidneydagi eng tor baland binoga, ehtimol, dunyodagi eng tor baland binolardan biriga aylanadi.
Minorada 173 xonali mehmonxona joylashadi. Butun binoga atigi ikkita yoʻlovchi lifti xizmat koʻrsatadi. Loyiha hujjatlarida obyekt 33 qavatli «qalam minora» sifatida tasvirlangan.
Qurilish boʻyicha arizani shaharsozlik sohasida ishlaydigan Mecone konsalting kompaniyasi tayyorlagan. Meʼmoriy konsepsiyani ishlab chiqish uchun toʻrtta byuro taklif etildi, 2021 yilda esa Durbach Block Jaggers loyihasi tanlandi.
Meʼmor Neil Durbach mehmonxona xonalari juda ixcham boʻlishini, ular «poyezddagi kupelarga deyarli oʻxshashini» aytdi. Xonalar maydonining kichikligi keng umumiy zonalar hisobiga qoplanishi rejalashtirilgan. Ular qatoridan yuqori qavatdagi basseyn va binoning quyi qismidagi katta jamoat maydoni oʻrin oladi.
Loyiha mahalliy aholi va boshqa kuzatuvchilar orasida turlicha munosabat uygʻotdi. Ayrimlar meʼmorlarning topqirligi va taklif etilgan texnik yechimlarni yuqori baholagan boʻlsa, boshqalar bunchalik tor bino qurish maqsadga muvofiqligiga shubha bildirdi.
