Dubayda uchuvchi avtomobillar paydo boʻlishiga tayyorgarlik koʻrilmoqda
Birlashgan Arab Amirliklarida uchuvchi avtomobillar paydo boʻlish istiqbollari oʻrganilmoqda. Bunday transport vositalarini boshqarish uchun oddiy haydovchilik guvohnomasi yetarli boʻlmasligi mumkin.
Dubay Yoʻllar va transport boshqarmasi (RTA) hozircha texnologiyaning rivojlanishini kuzatmoqda va uchuvchi avtomobillarning texnik xususiyatlari aniqlashtirilganidan keyin ular uchun meʼyoriy talablarni belgilashni rejalashtirmoqda. Dastlabki masalalardan biri — maxsus haydovchilik ruxsatnomalari zarurmi yoki bunday avtomobillarni oddiy avtomobil haydovchilik guvohnomasi bilan boshqarish mumkinmi, degan savol.
RTA Litsenziyalash agentligining ijrochi direktori Ahmed Mahbubning maʼlum qilishicha, idora yangi transport turi uchun toifani, uni roʻyxatdan oʻtkazish tartibini hamda undan toʻlaqonli foydalanish uchun infratuzilmaga qoʻyiladigan talablarni ham belgilashi kerak.
Mahbubning soʻzlariga koʻra, uchuvchi avtomobillarni qonunchilik bilan tartibga solish masalasi hokimiyat kun tartibiga nisbatan yaqinda kiritilgan. Shu bilan birga, Dubayda tegishli qarorlarni tayyorlash uchun hali vaqt bor, RTA esa bu yoʻnalishdagi rivojlanishni allaqachon kuzatib bormoqda.
Hozirda bunday avtomobillar sinovdan oʻtkazilmoqda. Dastlabki baholarga koʻra, ayrim modellarni ishlab chiqarish 2028 yilda boshlanishi mumkin. Biroq ularning Dubay yoʻllari va osmonida paydo boʻlish muddati hozircha belgilanmagan.
